غزل

کبھی میری نظر سے دیکھو تو قربان ہو جاؤ

مرے دل سے جو سوچو خود کو تو  حیران ہو جاؤ

نجانے کیا سے کیا ہو جائے گی نغمات کی دنیا

اگر میرے شکستہ ساز کی تم تان ہو جاؤ

نجانے فکروفن کے معجزے کیا کیا دکھاؤں میں

اگر تم میری غزلوں، نظموں کا  عنوان ہو جاؤ

ہر اک لحظہ نئی پہچان کی تم مانگ کرتے ہو

بہت مشکل کو تم اے دوست کچھ آسان ہو جاؤ

میں اپنی زندگی کے سارے ہی غم بھول جاؤں گا

اگر تم میرے زخموں کا کبھی درمان ہو جاؤ

عرفان

1 جون، 2003

یاد بہت تم آتے ہو

اجنبی ستارہ جب

راستہ بھٹکنے پر

بےبسی کے ہاتھوں سے

ٹوٹ کر بکھرتا ہے

یاد بہت تم آتے ہو

کوئی دل دکھائے تو

کوئی روٹھ جائے تو

یاد بہت ہی آئے تو

یاد بہت تم آتے ہو

کوئی پاس آئے تو

پیار سے بلائے تو

دل کے سونے آنگن میں

گنگھرو بجائے تو

یاد بہت تم آتے ہو

آسرا کوئی چھوٹے

سلسلہ کوئی ٹوٹے

لوگ جب ملیں جھوٹے

یاد بہت       تم آتے ہو

جب انا کی دیواریں

راستہ کوئی روکیں

بھگتی ہوئی پلکیں

ٹوٹتے ہوئے لہجے

پارسا وفاؤں پر

شرمسار ہو جائیں

بے حسی کے ہاتھوں سے

جب کبھی سزا پائیں

یاد بہت تم آتے ہو

27 اگست، 2004

اس دل میں کیا پاؤ گے

دل میں جھانکتی آنکھوں والے

اس دل میں کیا پاؤ گے

راکھ اڑاتی تیز ہوا میں

اپنا آپ گنواؤ گے

اس دل میں بھی پھول کھلے تھے

اس دل می بھی خوشیاں تھیں

محفل  اپنی محفل تھی اور

تنہائیاں بھی سکھیاں تھیں

جلتے بھجتے تارے بھی تب

اپنے اپنے لگتے تھے

چندا کی ہرحرکت پر ہم

اپنی  سانسیں گنتے تھے

چپکے چپکے روتے تھے ہم

چپکے چپکے ہنستے تھے

کہتے کہتے رْکتے تھے ہم

رْکتے رْکتے کہتے تھے

سارے خواب سراب ہوئے ہیں

سارے رستے دھول ہوئے

سچی باتیں جھوٹ ہوئیں

 اور سارے جھوٹ اصول ہوئے

راکھ اڑاتی تیز ہوا میں

اپنا آپ بکھرتا ہے

اپنا آپ بکھرتا ہو تو

ہاتھ بھی کون پکٹرتا ہے

دکھ کی مالا کے سب موتی

اپنے ہاتھ سے چنتے ہیں

اپنی آہیں خود سنتے ہیں

اپنے آپ میں گھلتے ہیں

میری کربلاتی وحشت

آنکھوں سے کم چھنتی ہے

میری سسکی کی آوازیں

رات ہوا ہی سنتی ہے

میں بحرِ خاموش میں ابھرا

اک ویران جزیرہ ہوں

میں سورج کے ساتھ نکلتا

اک سنسان سویرا ہوں

اک معلوم حقیقت ہوں میں

مجھ سے نظر ملاؤ گے

دل میں جھانکتی آنکھوں والے

اس دل میں کیا پاؤ گے

غزل

دل میرا ویران تھا احساس پر گہرا نہ تھا

تجھ سے پہلے خوف تھے پر غم کا یہ پہرہ نہ تھا

اور بھی اسباب تھے بربادئ دل کے مرے

سر تیرے یہ اس تباہی کا فقط سہر ا نہ تھا

تو نے میرے ذوق کا معیار مشکل کر دیا

تھی طبیعت جو تری سی تیرا سا چہرہ نہ تھا

منتظر آنکھیں رہیں برسوں تلک جس کے لیے

آہ! وہ لمحہ کہ جو لمحہ بھر کو بھی ٹھہرا نہ تھا

غزل

جب وہ نہیں تو اے دل یہ دھڑکنیں بھی کیوں ہوں

جب خامشی مقدر تو آہٹیں بھی کیوں ہوں

جب کچھ بھی کر نہ  پائے انسان بےبسی سے

تو اس کے دل میں یا رب یہ خواہشیں بھی کیوں ہوں

اب جاگیئے تو کیونکر؟ سو جائیے تو کیسے؟

اب اپنی زندگی میں یہ راحتیں بھی کیوں ہوں

جب توڑ دی ہے تو نے میری کمان ظالم

تو دشمنوں سے مجھ کو شیکایتیں بھی کیوں ہوں

کتنا حسین ہوتا اپنا ملاپ جاناں

لیکن جہاں کی دوزخ میں جنتیں بھی کیوں ہوں

کتنی دکھی تھیں عرفاںؔ وہ بادلوں سی آنکھیں

صحرا ہو جب مقدر تو بارشیں بھی کیوں ہو

بڑی دیر سے ملے ہو!

بڑی دیر سے ملے ہو!

تب کیوں نہیں ملے تھے؟

جب زندگی ہماری

اک مشکبو کی مانند

دامان ڈھونڈتی تھی

جب حرف جوڑتے تھے

تو وہ صدا  سی بن کر

میرے شہرِ آرزو میں

ہر لمحہ گونجتے تھے

تب کیو ں نہیں ملے تھے؟

جب حوصلے ہمارے

تیشے کو ہاتھ لے کر

کہسار کھودتے تھے

ہم تم کو ڈھونڈتے تھے

تب کیوں نہیں ملے تھے؟

--------------------------------------

تب  کیوں نہیں ملے تھے؟

جب  اپنی مملکت میں

اک شہر ِ آرزو تھا

اک گلشنِ وفا تھا

جہاں بلبلوں کے  نغمے

تھے ترجمان اپنے

لگتی تھی ساری دنیا

جب ہم کو کچھ نئی سی

ہم خود بھی جب نئے تھے

تب کیوں نہیں ملے تھے؟

--------------------

کوئی شوقِ عہدِ رفتہ

مرے پاس اب نہیں ہے

کچھ ذوق رہ گئے ہیں

غم روزگار کے ہیں

گردش میں رات دن کی

 بڑی دیر سے نہیں ہے

کوئی فرصتوں کی ساعت

جب فرصتیں بہت تھیں

جب حوصلے تھے  قائم

جب آرزو کے گلشن

 میں  پھول کھل رہے تھے

تب کیوں نہیں ملے تھے؟

بڑی دیر سے ملے ہو!

بڑی دیر سے ملے ہو!!

(ڈاکٹرعرفان شہزاد)

اتنا سوچ لو جاناں

پریم کی چتاؤں میں

زندہ جلنا پڑتا ہے

اتنا سوچ لو جاناں

ایسا کرنا پڑتا ہے

خواب تم نے دیکھے ہیں

منزلوں کو دوری پر

منزلوں سے پہلے ہی

راستے میں مجبوری

بے شمار اندیشے

خوا ب توڑ دیتے ہیں

جن کو اپنا کہتے ہیں

ساتھ چھوڑ دیتے ہیں

وہ، انا کی دیواریں

اس طرح اٹھاتے ہیں

جن کو توڑتے اپنے

ہاتھ ٹوٹ جاتے ہیں

ضبط کی فصیلوں میں

کھولتے سے اشکوں کو

 راستہ نہیں ملتا

خون بن کر بہتے ہیں

اشک جب بھی بہتے ہیں

دید کو پریمی کی

آنکھ یوں ترستی ہے

جیسے منزلوں پیچھے

راہ سے بھٹکنے پر

جان سے تہی بدو

پیاس سے سسکتے ہیں

وحشتوں سے جنگ ہوگی

دنیا کربلا ہوگی

کربلا سی دنیا میں

ہار کر سبھی کچھ تو

نہ تو نامور ہوگا

نہ ہی تیرے دشمن پر

 کوئی بھی شتم ہوگا

چل سکو تو آجاؤ

ورنہ سوچ لو جاناں

واپسی کے رستے میں

نارسائی کی آتش

عمر بھر جلاتی ہے

سب خوشی بھی مل جائے

پھر بھی اک کسک کوئی

عمر بھر کھٹکتی ہے

زندگی بھٹکتی ہے

25 جون 2004

غزل

خاموش ہوں میں آنکھ نے بھی کچھ کہا نہ تھا

میں ضبط کے قانون کا مجرم ہوا نہ تھا

آواز میں محرومیوں کی باس تک نہ تھی

ہنستے ہوئے نمکینیوں کا ذائقہ نہ تھا

ہم وحشتوں کی اوج میں بھی ہوش مند تھے

ہم کو تیری رسوائیوں کا حوصلہ نہ تھا

سورج غروب ہو کے گرا تھا خزاں کےبعد

اور آسماں پہ چاند بھی آیا ابھی نہ تھا

ایسے میں تیری یاد کی برسات آ گئی

مجھ کو لگا میں شاخ سے بچھڑا ہوا نہ تھا

تم نے مجھے گریہ کناں دیکھا کبھی نہیں

مژگاں میں آگ تھی مگر دامن جلا نہ تھا